[115] EPISTOLA XV.

IUSTUS LIPSIUS

HADRIANO VANDER-BURCH,

Graphiario in Curia Ultrajectina.

Ultrajectum.

Valde benigne me provocas, Vir ornatiss. & ad amandum & ad scribendum. Quorum alterum nunc facio: alterum olim, quia revera amavi te & aestimavi, ex quo tempore versus tuos legi non falsos indices elegantioris ingenij & doctrinae. Addo fratrem tuum virum egregium, & in me sic amicum, ut ejus caussa amandos mihi omnes putem, qui ad illum. Ut si in te caussa amoris mei non sit (quae est largiter) sumere possim ab illo. Itaque vere & serio hoc scito, redamari te a me, cultum te a me iri scriptione, literis, cum res feret, alloquiis & omni genere officiorum hujus inter amicos. Nota tua in Propertii versibus acuta & proba. De Silio & Rufo, non obscurum, vitam sine admota ulla externa vi finiisse eos pertinaci abstinentia a cibis. Vale vir prudentissime, & brevitati huic ignosce, cui languor meus caussa. Nam diuturnus ille morbus meus ne nunc quidem dimisit. Lugd. Bat. XVII. Kal. Ianu. MDLXXXV. D. Decanum fratrem tuum valde a me salvere velim. Exemplar hic tibi adjunctum centuriae epistolarum quam nunc emisi, habe ut novae amicitiae nostrae arram.